CEBU CITY – Patay ang usa ka piniriso human kini matod pa nisukol sa mga nirespondeng pulis sa Brgy. Luz dakbayan sa Sugbo.
Sa impormasyon sa Cebu City Police Office (CCPO) naila ang na neutralized nga si Roberto Ludong kinsa nipuga kauban ang laing duha pa ka bilanggo sa Mabolo Police Station gamit ang gituhu-ang hait nga butang nga mao ang giputol sa railings sa prisuhan.
Nisukol matod pa si Ludong pina-agi sa pagpusil sa mga otoridad nga niresponde alang sa pagpabalik sa mga nipuga sa prisuhan.
Kauban ni Ludong sa pag-iskapo ang mga piniriso nga nailang silang Oliver Sabala Basak ug Nico Urot Baylosis. Nadakpan ug balik si Basak samtang naka-ikyas ug padayon pa nga gipangita si Baylosis.
Segon kang CCPO Director PCol Josefino Ligan atol sa pakighinabi sa Bombo Radyo Cebu nga gawas-sulod na sa prisuhan ang mga piniriso diin nalambigit kini sa kaso sa iligal nga drogas ingon man robbery.
Nanawagan si Ligan sa ‘at large’ nga si Baylosis nga mosurender nga malinawon sa otoridad.
Samtang gi-imbestigaran na sa CCPO ang mga on-duty Police Officers diin posible matod pa kining mag-atubang ug administrative case subay sa nahitabong ‘jailbreak’.
