CEBU – Malipayon ug mapasigarbuhon ang kapulisan sa Sugbo human nga napili isip bag-ong PNP Chief si Police Major General Debold Sinas.
Sa eksklusibo nga pakighinabi sa Bombo Radyo ni Police Colonel Josefino Ligan, Cebu City Police Office Director, matud pa nga dako niini nga garbo ang maong kalamboan gumikan kay gikan usab sa Police Regional Office 7 si General Sinas, ug nasayod kini sa maayo nga track record sa police official.
Sigon ni Ligan nga isip staff kaniadto ni General Sinas, giingong nagtamod gayud kini sa maayo nga liderato, ingon man work ethics sa heneral.
Gani, giingong halos dili na matulog ang naasoy nga police official gumikan sa pagtutok niini sa trabaho, hayan angayan lang usab nga mahimo kining PNP Chief.
Gihimug-atan ni Col. Ligan nga suportado sa kapulisan sa CCPO ang mga lakang ni General Sinas, ang padayon nga pakigbatok sa iligal nga drogas, ingon man ang giingong pagdili sa kapulisan nga magduwa ug golf sa panahon sa ting-trabaho o duty hours.
Subay niini, gisiguro sa CCPO Director nga padayon ang ilahang subsob nga paggukod sa iligal nga drogas, ug giawhag niini ang publiko nga tabangan usab ang kapulisan sa anti-illegal drug campaign, kansang kampanya usab sa Duterte administration.
