CEBU CITY — Wala na makatago ang usa ka high value target regional level sa gipahigayon nga buybust operation niadtong Nobyembre 20 sa buntag sa Camia St. Barangay Tisa, dakbayan sa Sugbo.
Giila ang dinakpan nga si Jeanneth Abayan, 33 anyos, ug residente sa 142 B. Spolarium St., Barangay Duljo Fatima, Cebu City, apan kasamtangan nga nagpuyo sa Barangay Tisa.
Gisaysay ni Police Major Randy Caballes, City Intelligence Unit Chief sa Cebu City Police Office, nga kapin sa usa ka semana nila nga gipaubos sa surveillance ang suspek hangtud nga napahigayon ang operasyon.
Matud pa nga maka-dispose ug usa hangtud sa duha ka kilo nga shabu si Abayan lukop syudad sa Sugbo, ingon man sa kasikbit nga lugar.
Nasayran nga usa ka piniriso sa Cebu City Jail Male Domitory ang drug supplier niini.
Nakumpiskar sa kapulisan, kauban ang PDEA 7, sa posisyon sa dinakpan ang usa ka kilo ug 20 gramos nga shabu ug nagkantidad kini ug P6,936,000.
Samtang, gikustodiya na sa kapulisan si Abayan, ug nag-atubang kini ug kasong kalapasan sa RA 9165 o ang Comprehensive Dangerous Drugs Act of 2002. (SBR)
