![](https://img.bomboradyo.com/cebu/2021/03/medellin-police-1.jpg)
CEBU CITY — Giimbestigaran karon sa mga sakop sa kapulisan ang kamatayon sa usa ka piniriso kinsang gibanhigan-patay human mipyansa kaganihang buntag sa Brgy. Don Virgilio Gonzales, lungsod sa Medellin, Cebu.
Giila ang biktima nga si Reynaldo Batad Arcenal, 48-anyos, ug giingong usa ka drug personality gikan sa lungsod sa San Remigio.
Matud sa hepe sa Medellin Police Station nga si Police Major Wilter Grapa nga kauban sa biktima ang unom ka mga kabanay sakay sa usa ka van diin gikan lang sila nipyansa sa kasong may kalambigitan sa ilegal nga drugas.
Sa dihang ni-abot sila sa mingaw nga dapit, daling mibabag sa gi-agian nila ang duha ka van sakay ang walo ka mga wala mailhing suspetsado.
Sumala pa ni Grapa nga gipahapa sa mga suspek ang driver ug gipadaplin ang mga kuyog dayon og pagpaarak sa armas ngadto ni Arcenal.
Nakaangkon og mga samad-pinusilan sa lawas ang maong piniriso samtang naigo usab sa bala ang igsuon niining babaye.
Namatay ang biktima sa dihang gidala kini dayon sa tambalanan ug kasamtangang nagpaalim ang igsuon niini human masalbar.
Transaksyon sa drugas ug personal grudge ang gilantaw nga mga motibo sa kamatayon sa maong biktima.
Padayon pang gisubay sa hingtungdang otoridad ang criminal records sa biktima samtang nagpadayon ang hot pursuit operation alang sa pagkasikop sa mga gunmen.