CEBU – Sikop sa mga operatiba sa National Bureau of Investigation(NBI) Central Visayas ang 60 anyos nga Yugoslavian sa dihang gi implementar ang warrant of arrest niini sa seven counts of Child Prostitution ug Sexual Abuse ug eight counts sa Human Trafficking sa Brgy. Canamucan, lungsod sa Compostela, Cebu.
Gipanguluhan sa NBI Anti Organized Crime nga nakabase sa Manila Special Investigation pina-agi kang Investigator 4 Cesar Rivera ug Cebu Investigator Agapito Giran ang pag-serve sa warrant of arrest nga miresulta sa pagkasikop ni Steve Hidosan Sinisa, nga matod pa nag sideline usab sa pagpamaligya ug manok pang sabong diin nagpaila matod pa kini nga canine trainer sa PNP ug PDEA.
Matod pa ni NBI-7 Regional Director Atty. Renan Oliva nga kaniadto pang Enero 14, 2013 giluwat ang warrant of arrest sa Regional Trial Court Branch 61 sa Angeles City ni Judge Bernardita Gabitan Herom sa kasong kalapasan sa Sec 5(b) sa RA 7610 pito ka ihap sa child prostitution ug sexual abuse nga adunay P200,000 nga pyansa ingon man ang kalapasan sa sec 4(e) and 3(a) in relation to section 6 sa RA 9208 Anti-Trafficking in Persons Act of 2003 nga walay girekomendar nga pyansa.
Matod ni Oliva nga gikan sa Angeles City, Pampanga si Sinisa ug nagtago-tago matod pa sa kamot sa balaud sulod sa walo ka tuig human nalutsan ug warrant of arrest sa naasoy’ng kaso sa Lungsod sa Compostela. Sa dihang nasikop kini wala kini nakapakita ug igong dokumento nga legal ang pagpyo niini sa Compostela.
Segon pa ni Special Investigator 4 Cesar Rivera nakadawat kini og impormasyon nga daghan na nga mga bata sa Angeles City ang nabiktima sa suspek hinungdan nga gipangita kini sa otoridad.
Nasakpan ang maong suspek human adunay informant nga mireport sa buhatan kabahin sa usa ka ‘wanted person’ nga nanimuyo sa maong lugar diin nakumpirmar kini ug didto nasuta nga aduna’y outstanding warrant of arrest.
Human sa dokumentasyon niini sa Cebu, dad-on sa NBI sa kaulohan ang maong suspek ug ipahibawo sa RTC Branch 61 Angeles City nga nasikop na si Sinisa ug didto ibalhog sa city jail diin magpadayon ang maong kaso niini ug sa oras nga makonbikto kini, atubangon niini ang tukmang silot og i-deport ngadto sa gigikanan nga dapit.ll BJG
