CEBU – Gipapauli na ang mga indibidwal nga nadakpan human makalapas sa curfew ug sa health protocols batok sa coronavirus.
Segun kang Cebu City PROBE Team head, Raquel Arce, gumikan sa kadaghan sa mga nadakpan lakip na ang anaa sa kapin usa ka gatus nga nasikop atol sa Oplan Bulabog sa kapulisan, PROBE team ug ubang ahenisya niadtong adlaw’ng Domingo.
Matud ni Arce nga girelease na ang mga nakabyad sa P500 nga multa samtang nagpahigayon na usab sa ilang ‘community service’ ang ubang wala nibayad.
Gihimug-atan ni Arce nga naanad na siya sa maong trabaho ug padayon matod pa nila nga gipaningkamutan nga mapatuman ang kasamtangang palisiya sa syudad lakip na ang pagpatuman sa protocols ning panahon sa pandemya.
Subay niini, giawhag sa opisyal ang mga brgy. officials nga molihok ug trabahuon ang ilang responsibilidad sa pagbantay sa ilang mga dapit. Mabutang matod pa nga ‘liable’ ang mga opisyal kung wala kini mahibawo sa mga nahitabo sa ilang brgy.
Gihimug-atan ni Arce nga dili rason nga kuwang ang manpower sa mga brgy., sanglit pwede kini nga makig-alayon sa ubang ahensiya sa otoridad sama sa kapulisan, sa PROBE aron maaksiyunan ang mga kalapasan.
