CEBU – Gisugdan na sa syudad sa Sugbo ang pagbakuna sa mga bata nga nag-edad ug 5 ngadto sa 11 anyos, karung adlawa.
Gipahibalo ni Cebu City Councilor Joel Garganera, Emergency Operation Center (EOC) head, nga sugod kaganihang alas 8 sa buntag hangtud sa alas 2 kaganihang hapon, pormal nga gi-ablihan ang vaccination alang sa mga bata sa Cebu City Sports Center, ingon man sa Ayala Mall.
Matud ni Garganera nga inay mahadlok, hilabihan ka lingaw sa mga bata gumikan sa surprisa nga ilahang gidalit diin adunay mga cosplayer, mga nag-mascot, ingon man mga nagsul-ob superheroes.
Gawas usab niini, nagkalain-lain nga tema usab ang makita sa matag ‘steps’ sa maong pagpabakuna.
Makadawat usab ug mga loot bags ug pagkaon ang mga bata human sila nga mabakunahan.
Gibutyag ni Garganera nga sa pagkakarun duha pa lang ka venue ang ilahang naabliha nga mo cater sa mga bata, apan malaumon kini nga madugangan pa kini sa umaabot nga mga adlaw.
