CEBU CITY – Nasikop sa kapulisan ang nailhan nga ig-agaw sa kanhi inila nga drug lord nga nakabasi sa Isla sa Banakon, lungsod sa Getafe, Bohol.
Giila ang dinakpan nga si Mark Secretaria Duaban, 42 anyos, ug nagpuyo sa Sitio Riverside, Barangay Duljo-Fatima, syudad sa Sugbo.
Gipahigayon sa mga sakop sa Regional Police Drug Enforcement Unit 7 ang anti-illegal drug operation, kung diin nadakpan ang naasoy nga drugista sa Sitio Black Cat sa susamang barangay.
Nakuhaan kini ug iligal nga drogas nga mitimbang ug duha ka kilo ug usa ka 75 gramos nga mukantidad ug P14.1 million.
Gigamit sa maong dinakpan ang usa ka 9-anyos nga batang lalaki isip drug courier.
Nasayran nga si Duaban ang ig-agaw sa inila nga drug lord nga si anhing Rowen “Yawa” Secretaria nga naglihok sa probinsiya sa Bohol, kinsang tawo usab ni anhing Jeffrey “Jaguar” Diaz.
Ang maong drugista ang nasayran nga nahimo usab nga tawo ni Tata Negro sulod sa tulo katuig, diin napriso usab niadtong 2016.
