CEBU – Gi-imbestigaran karon sa Estados Unidos ug Canada ang usa ka multistate outbreak sa sakit nga norovirus nga nalangkit sa hilaw nga mga oysters o talaba gikan sa Canada.
Gipasidan-an ang mga restaurant ug retailers nga dili mamaligya o mag-serve sa posibleng kontaminado nga hilaw nga talaba, nga giani sa habagatang bahin sa Baynes Sound, British Columbia, Canada.
Giingong gi-apod apod ang mga talaba sa 13 ka estado, apan ang uban mahimo usab nga nakadawat niini pinaagi sa dugang nga pag-apod-apod sulod sa Estados Unidos.
Gikompirmar sa U.S. Food and Drug Administration nga kompirmadong nakadawat ang mga estado nga California, Colorado, Florida, Hawaii, Illinois, Massachusetts, Minnesota, New Jersey, New York, Nevada, Oregon, Texas ug Washington sa contaminated oyters.
Nagpahigayon ang FDA ug ang mga estado sa gitawag nga “trace forward investigation” aron mahibal-an kung diin ang mga hilaw nga oysters giapod-apod ug aron matangtang kini sa food supply.
Samtang ang pagkaon nga kontaminado sa norovirus mahimong normal tan-awon ug lami, apan mamahimo kining hinungdan sa diarrhea, vomiting, nausea, stomach pain, fever, headache ug sakit sa lawas sulod sa 12 hangtod 48 ka oras human kini gikaon.
