CEBU – Mipadayag sa iyahang kahingawa ang mayor sa lungsod sa Tudela, isla sa Camotes, sa nahitabong pagpangliki ug pagkapikas sa ilahang kabukiran, diin posibli gayud nga adunay musunod nga lain na unya nga katalagman kung dili ma-aksyonan.
Gikasagmuyo ni Mayor Greman ‘Jojo’ Solante ang susama nga walay pagpakabana sa Provincial Disaster Risk Reduction and Management Division, sa ilahang pakig-alayon arun nga matabangan sila sa ilahang lungsod.
Matud pa sa mayor nga igo lang silang gitubag nga “holiday karun” ug walay tawo sa PENRO.
Tataw pa sa opisyal, walay holiday sa katalagman, ug dili kini makapaabot ug hangtud sa adlaw’ng Lunes nga mabalik na sa opisina ang mga trabahante sa gobyerno.
Gani, gipadayag ni Mayor Solante nga pareho silang mga anaa sa gobyerno nagtrabaho, apan sila naglihok bisan pa man sa holiday.
Gitino niini nga gikinahanglan nila ang abag karun sa Office of the Civil Defense, isip mao’y lead agency sa Regional Disaster Risk Reduction and Management Council, gamit ang resources sa national government, sa pagpahigayon ug aerial survey sa affected area, diin pag-angkon sa mayor nga dili na nila kini makaya ug maglisod sila sa pag-‘penetrate’ sa area.
Gawas sa lungsod sa Tudela, apektado usab ang lungsod sa Poro sa naasoy nga isla, diin nakatala usab ug pagpangliki sa ilahang kabukiran, butang hilabihan nang gikabalak-an sa mga opisyal.
Nipahigayon na og pakigpulong ang lungsod sa Tudela ug Poro aron hisgutan ang mga nahitabong pagpangliki sa pipila ka lugar nga nahisakop sa ilahang hurisdiksyon.
Atol sa panagpulong, gibutyag ni Mayor Gary Rama,sa lungsod sa Poro sa Camotes, nga mokabat na sa 27 ka pamilyahan ang gipabakwit sa ilahang gimontar nga temporary evacuation center.
Matod ni Rama, nga nakit-an ang maong pagpangliki sa yuta pasado alas 5 sa hapon sa ug gumikan niini dali kining nihimo og aksyon.
Lakip na ang pagpatawag sa tanang miyembro sa Municipal Disaster Risk Reduction and Management Council (MDRRMC) aron hina hinay nga masugdan ang pagpabakwit sa mga pamilya.
Gisuwayan na usab pagkombinsir sa mga sakop sa MDDRMC ang ubang pamilyang apektado alang sa usa ka forced evacuation.
Nibutyag si Rama, nga aduna na kini contact sa provincial department apan wala kini nakuhang tabang gumikan sa susamang rason nga holiday maong nangita nalang kini og paagi aron maka-access sa regional department.
Sa kasamtangan, naghuwat nalang ang ilahang grupo sa mamahimong rekomendasyon sa rehiyon.
