CEBU – Gikustodiya na karun sa Talisay PNP ang usa sa mga suspek sa pagtulis ug pagputol sa dila sa usa ka taxi driver nga si Andres Alfanta.
Giila ang suspek nga si Alex o Alexander Rematado, 30 anyos, ug residente sa Barangay Perelos, dakbayan sa Carcar.
Gisaysay ni Police Lieutenant Colonel Randy Caballes, hepe sa Talisay PNP, nga nakadawat sila ug information kalabot sa nahimutangan sa suspek kinsang adunay warrant of arrest sa kasong robbery niadto pang 2013.
Sa pagsusi sa kapulisan, nasuta nga aduna usab kini pending warrant of arrest sa kasong murder sa probinsiya sa Bohol.
Subay niini, nasayran usab sa kapulisan nga mao usab kini ang suspek sa pagtulis ug pagputol sa dila sa nahisgutang taxi driver sa lungsod sa San Fernando, ug kini positibo usab nga gitudlo sa biktima.
Gipahibalo ni Caballes nga ang dinakpan kay Top 8 Most Wanted sa provincial level.
Gidugang pa sa hepe nga si Rematado kasamtangan nga nagtrabaho sa usa ka mall sa dakbayan sa Mandaue.
Sa pagkakarun, ang kapulisan usab sa San Fernando ang muhupot sa dugang kaso nga ‘robbery with intimidation’ batok sa dinakpan.
