CEBU – Tulo ka mga lalaki ang nasikop sa ilegal nga shabu nga mobalor og dul-an P100 milyones sa managlahing buy-bust operation, sa Sugbo, niadtong Sabado, Abril 23 .
Unang nasakmit sa mga otoridad ang 10 ka kilo nga shabu nga mobalor og P68 milyones sa buy-bust operation sa Barangay Guadalupe, dakbayan sa Sugbo Sabado sa hapon sa RPDEU-PRO-7.
Ang dinakpan giila nga si Josh Vincent Bacalan Camion, 24, residente sa susamang dapit.
Matod sa kapulisan nga ang suspek nasikop tungod sa illegal possession of firearms niadtong 2020 ug gi-monitor sulod sa milabayng walo ka buwan hangtod sa pagkasikop niini.
Pasado alas 7:00 sa gabii, nasakmit sa mga sakop sa Mabolo Police Station ang dili mominus 3.1 kilos nga shabu nga mobalor og P21,080,000 ug nasikop ang usa ka Jastine Cabahug Mantos sa Sitio Lahing-Lahing 1, Barangay Mabolo.
Gikonsiderar sa kapulisan nga si Manto, taga Sitio Tuburan, Barangay Jubay sa lungsod sa Liloan, usa ka high value individual tungod sa giingong pagkalambigit niini sa ilegal nga drugas.
Gibanabanang mokabat sa P3.4 milyones nga kantidad sa shabu ang nasakmit sa mga awtoridad sa dakbayan sa Mandaue sa ilang buy bust operation sa Barangay Looc, dakbayan sa Mandaue.
Giila ang suspek nga si Harrison Ybañez, 50, taga A. Lopez sa dakbayan sa Sugbo.
Nasuta nga mokabat sa tunga sa kilo sa gituohang shabu ang nakuhang ebidensya gikan kanila nga mobalor og P3.4 milyones ka pesos.
Gisubay pa sa mga operatiba ang tinubdan sa ginadili nga druga nga gidala sa tanang kaso.
Mag-atubang ang mga suspek og kasong kalapasan sa Section 5 ug Sec. 11 sa Article 2 sa Republic Act 9165, o mas nailhan nga Comprehensive Dangerous Drugs Act of 2002.
