CEBU – Pagpahinumdom sa integridad ug pag-ila isip mga Pilipino ang labing importante nga simbolo nga gidala sa bandera sa Pilipinas.
Gipasabot ni Dr. Ryan Maboloc, usa ka Political Science professor sa Ateneo De Davao University, nga ang Mayo 28 isip National Flag Day ang maghatag ug garbo ug ‘patriotism’ sa mga Pilipino sa kaugalingong nasud.
Matud pa, kini magpahinumdom sa tanan nga gikinahanglan nga pangga-on ug depensahan ang nasud, ingon man ang pagpabilin nga magmaligdong isip mga Pilipino.
Gidugang ni Maboloc, nga kining tanan ang gipakita sa bandera sa nasud, kung diin ang walo ka mga sidlad sa adlaw ang nag-simbolo sa walo ka mga probinsiya nga nakigbatok sa mga Espanyol nga mananakop; ang tulo ka bitoon nga nag-simbolo sa Luzon, Visayas ug Mindanao; puwa isip tima-an sa ka-isog sa mga Pilipino sa pakigbatok sa mga mananakop; ingon man ang puti, tima-an sa kaputli sa kasingkasing sa mga Pilipino.
