CEBU – Mag-atubang si Cebu City Mayor Michael Rama og election protest nga gipasaka sa iyahang kaatbang sa nakalabay nga pinili-ay nga si kanhi Cebu City Councilor Margarita ‘Margot’ Osmeña.
Gipahibalo ni Osmeña nga gipasaka niini ang maong protesta sa kaulohan, apan wala kini mipahibalo kung kanus-a niini gi-file ang maong election protest.
Sa habig ni Mayor Rama, giingong wala pa kini makadawat ug kopya sa maong protesta apan giingong iyaha nang gihatagan ug mando ang iyahang mga abogado nga sila si Atty. Colin Rosell ug Atty. Ernesto Rama.
Gisiguro sa mayor nga ang maong election protest kay dili maka-apekto sa preparasyon sa iyahang paglingkod nga magsugod karung Hunyo 30, 2022.
Nagkanayon si Rama nga ‘all set’ na ang iyahang inagurasyon, ingon man ang transisyon sa administrasyon.
