CEBU – Luwas nga nadala sa baybayon ang 158 ka mga pasahero ug tripulante sa roll-on-roll-off (ro-ro) vessel nga natanggong sulod sa kapin pito ka oras sa Mactan Channel.
Kini ang gibutyag ni Lieutenant Junior Grade (LTJG) Krysta Bergantin, tigpamaba sa Philippine Coast Guard sa Central Visayas (PCG-7), atul sa pakighinabi niini sa Bombo Radyo Cebu, nga ang tanang pasahero sa MV Lite Ferry 11 gihatod og balik sa Ouano Wharf gabie mga alas 11 Domingo, Hulyo 10,2022.
Matod ni Bergantin nga nakahukom ang shipping company nga i-reschedule ang ilang biyahe karung adlawa Lunes, Hulyo 11, alas 11 sa gabii.
Una nang gikompirmar sa PCG-7 nga ang MV Lite Ferry 11, paingon sa Ormoc City, nga napakyas sa pag-abot sa ilang destinasyon human nibiya sa Sugbo agi sa Ouano Wharf sa Mandaue City alas 11 sa buntag gahapon Domingo.
Ang barko moabot unta sa Ormoc mga alas 6 sa gabii, Apan niadtong tungora, nahimutang na hinuon kini sa duha ka nautical miles gikan sa Bagacay Point sa lungsod sa Liloan, amihanang Sugbo.
Basi sa inisyal nga mga taho sa tigpamaba sa PCG-7, nga nakita ang makina sa ro-ro nadaot, nga nag-aghat sa mga tripulante sa paghulog sa angkla aron mapadali ang pag-ayo.
Sa dihang nahuman na ang pag-ayo, ang mga tripulante naglisud sa pag-alsa sa angkla, hinungdan nga ang Lite Shipping kinahanglang magbutang ug dugang nga kagamitan aron maputol ang natanggong nga angkla.
Apan, bisan paman sa mga kakulian ang mga personahe sa Lite Shipping ug ang Coast Guard nakahimo sa pagdala sa MV Lite Ferry 11, ang mga pasahero ug tripulante niini balik sa baybayon pasado alas 10 sa gabii sa Domingo, o dul-an sa 12 ka oras sukad kini mibiya sa Ouano Wharf.
