CEBU – Moabut sa 4,000 ka police ug emergency rescue personnel ang ipakatap aron paghatag og seguridad atol sa kapistahan sa Pasigarbo sa Sugbo sunod Domingo, Agosto 28, 2022, kini ang gipahibalo sa Cebu Provincial Government.
Dugang pa, nga ang hiniusang personahe gikan sa Cebu City Police Office, Cebu Police Provincial Office, disaster risk reduction and management office, traffic management office ug emergency response team sa dakbayan sa Sugbo, kinsang idestino subay sa rota sa parada sa Osmeña Boulevard ug sa Cebu City Sports Center ( CCSC), diin ipahigayon ang pagpahigayon sa festival queen competition.
Ang paghatag sa mga mananaog himuon sa ikaduhang adlaw, Agosto 29, nga ipahigayun usab sa CCSC.
Atol sa tigom sa mga event stakeholders sa Kapitolyo, ang Visayan Electric nipasalig usab sa walay hunong nga suplay sa kuryente, ilabi na sa CCSC diin ipahigayon ang grand showdown competition.
Samtang ang Philippine Coast Guard Central Visayas mitanyag usab sa pagkarga sa upat ka contingents gikan sa Camotes Group of Islands, ingon man ang tulo ka contingents gikan sa Bantayan Island.
