CEBU – Gitino ni San Fernando, Cebu Vice Mayor Ricci Reluya nga adunay pondo alang sa sweldo sa mga job order employees ubos sa iyahang departamento apan giingong gi-reverse ug wala kini gi-realign sa ilahang konseho.
Sa eksklusibo nga pakighinabi sa Bombo Radyo Cebu kang Reluya, gibutyag niini nga ang pondo alang sa pag-sweldo sa 24 ka mga JOs kay gideklarar nga ‘unused’ sa konseho hinungdan nga nabalhin kini sa laing branch sa gobyerno.
Matud pa, ilaha na kining na-allocate ug na-appropriate sa nakalabay nga tuig apan tungod kay gideklarar kini nga ‘unused’, hayan dili kini nila magamit, butang nga hangtud karun ang mga naasoy nga JOs kay wala pa makadawat sa ilahang sweldo.
Basi usab sa iyahang pagpadangat niini sa DILG, giingong ang maong lakang sa konseho kay iligal.
Subay niini, gitino ni Reluya nga andam kining mugamit sa iyahang kaugalingong sweldo arun nga ihatag sa mga apektadong JOs, apan sa pagkakarun, giingong iyaha una nga hatagan ug igong away alang sa kung unsay insakto alang sa mga naasoy nga empleyado.
