CEBU – Gipahibalo ni LTFRB 7 Regional Director Eduardo Montealto Jr, nga wala’y miduso ug fare increase sa mga bus operators sa Central Visayas.
Gibutyag ni Montealto nga adunay petisyon sa pagpa-usbaw sa pletehan sa mga bus apan sa National Capitol Region (NCR) lang kini ug dili pa usab sigurado kung kini ma-aprobahan gumikan sa sunod-sunod na nga pagkunhod sa presyo sa lana.
Matud pa, kung mupasar man kini sa kaulohan, dili usab pasabot nga mapatuman kini lukop Pilipinas.
Karung semanaha ang ikapito nga pagkunhod sa presyo lana, ug subay niini, giingong wala may petisyon sa Central Visayas sa pagsaka sa pletehan sa mga bus.
Samtang, sa naghinangat nga pag-abli sa klase, gitataw usab ni Montealto nga pa-igo ang mga pangpubliko nga sakyanan nga maka-akomodar sa mga pasahero ilabi na sa gilauman nga pagdagsa sa mga tinun-an.
