CEBU – Gipakita sa resulta sa ikaduhang pagsusi nga niabot na sa 2400 milliliters (ml) ang fecal coliform level ang kalidad sa tubig sa Cordova sa Mactan Island, Cebu.
Kini human nipahigayon ang Department of Environment and Natural Resources (DENR) 7 og pagsulay sa palibot sa floating ug fixed cottages sa lungsod niadtong Agosto 10, 2022.
Kagahapong adlawa, mismong si Mayor Cesar “Didoy” Suan maoy mipahibawo sa resulta atol sa stakeholders’ forum sa gym sa lungsod sa Barangay Poblacion.
Gitambongan ang maong forum ni Gobernador Gwendolyn Garcia ug mga representante sa nagkadaiyang ahensya sa gobyerno.
Una nang gibutyag ni Suan nga dili na angayang langoyan ang tubig sa Cordova human sa unang pagsusi sa kalidad sa tubig nga nagpakita sa fecal coliform level nga 1,300 ml.
Nasayran base sa website sa DENR, anaa lamang sa 100 most probable number kada 100 ml ang standard coliform level alang sa kabaybayonan nga luwas alang sa paglangoy ug uban pang susama nga mga kalihokan sa paglingaw-lingaw.
