CEBU – Padayon karun ang imbestigasyon sa kapulisan sa pag-ambush patay sa inila nga hardhitting commentator nga si Percival Mabasa o mas nailhan sa ngalan nga Percy Lapid.
Sa eksklusibo nga pakighinabi sa Bombo Radyo Cebu kang Roy Mabasa, usa ka kolumnista ug igsuon sa biktima, giingong nakig-alayon na sila sa kapulisan ug gawas sa ilahang statement kay gisusi na usab karun sa mga otoridad ang dash camera sa sakyanan ni Percy ug ang cellphone niini.
Matud pa, wala may gipahibalo ang biktima nga aduna kini death threat apan giingong basin ug dili lang kini gusto nga mabalaka ang iyahang pamilya.
Samtang, gisaysay usab ni Mabasa nga sulod sa 35 katuig nga nahimong brodkaster kay vocal na ang karakter sa iyahang igsuon ug paglabay sa panahon mas nagkaha-it ang mga gibuhi-an niini nga mga pulong ug mga pag-analisar sa iyahang mga gihisgotan nga isyu hinungdan nga posibling aduna kini nasakitan.
Dugang pa niini, dili kini gusto nga muhimo ug konklusyon apan gihimug-atan ni Roy nga wala may kaaway ang iyahang igsuon ug bugtong ang mga ‘leaders of the land’ o mga politiko lang ang unod sa mga mainiton nga komentaryo niini, butang nga angayang tutokan sa mga imbestigador.
Isip usa ka sakop sa media, wala kini magdahum nga sa iyahang adbokasiya nga mahunong na ang pagpatay sa mga magsisibya kay nahitabo gayud kini mismo sa iyahang pamilya hinungdan nga hustisya ang panawagan niini.
