CEBU – Giawhag sa Cebu City Transportation Office (CCTO) ang City Government nga iapil ang pagpalit og speed guns sa annual budget sa Siyudad isip usa ka paagi sa higpit nga pagpatuman sa speed limit sa mga karsada sa dakbayan.
Kini ang gibutyag sa CCTO executive director nga si Paul Gotiong , nga nitanyag sila og P1.5 milyones alang sa pagpalit og speed guns, apan nagkinahanglan pa kini og pagtugot sa City Council.
Una nang gitaho sa CCTO nga mokabat sa 230 ngadto sa 400 ka vehicular accident ang nahitabo sa mga karsada sa dakbayan matag buwan gikan sa Enero hangtod sa Hulyo ning tuiga.
Apan matud ni Gotiong nga dili sila maka-categorize kung nahitabo ang mga aksidente tungod sa kakusog sa dagan sanglit ang Traffic Enforcement Unit sa Philippine National Police maoy nagdumala sa imbestigasyon.
Dugang pa, nga adunay speed guns ang CCTO apan wala nila kini gamita sa pagpanakop sa mga badlungong drayber tungod kay dili nila masaligan ang maong gadget.
