Giablihan pag-usab sa Cebu City Transportation Office (CCTO) ang Foodland Flyover para sa mga motorsiklo nga mobiyahe alang sa northbound ug southbound nga direksyon, ug kini epektibo dayun ganinang alas 8:00 sa buntag, Huwebes, Agosto 6.
Ang advisory gipagawas usa ka adlaw human sa hingpit nga pagpatuman sa Oplan Bantal, subay na usab sa mga nadawat nga ‘feefback’ sa mga motorista.
Kahinomdoman nga gilusad sa Cebu City Transportation Office (CCTO) gahapon lang, Martes, Agosto 5, ang hingpit nga pagpatuman sa motorcycle lane policy o ang “Bantal Motorcycle Lane Policy” human sa lima ka adlaw nga information campaign niini.
Gani, gipahibalo pa ni CCTO Head Raquel Arce nga multahan og P1,000 ang unang kalapasan sa mga motorista nga masakpang molapas sa maong lagda.
Diin, giklaro usab ni Arce nga ang maong “Motorcycle Lane” dili “exclusive” ra alang sa mga motorista, gumikan kay matod pa niya, aduna gihapoy mga 4-wheel nga tugutang makasulod sa Motorcycle Lane kung hinay ang gikusgon sa pagpadagan niini.
Sa kasamtangan, adunay daghang mga feedback ang mga motorista kabahin sa maong lagda sa kadalanan nga gipatuman, diin adunay daghang positibo ug negatibo.
