CEBU – Nipadayag og suporta ang opisyal sa Department of Education (DepEd) sa Central Visayas sa sugyot sa pagpalapad sa curfew hours sa mga menor de edad sa dakbayan sa Sugbo isip dugang security measure.
Kini human si Cebu City Police Office (CCPO) Chief Colonel Ireneo Dalogdog niingon nga ilang isugyot sa Cebu City Council nga palapdan ang curfew hours sa dakbayan alang sa mga menor de edad nga kasamtangang gikan sa alas 10 sa gabii hangtod alas 4 sa buntag, sa alas 9 sa gabii ngadto sa alas 4 sa kaadlawon human maobserbahan nga kasagarang momugna og kasamok ang mga menor de edad sa sayong kagabhion, gumikan sa nahitabong pagpanulis nga gihimo sa usa ka menor de edad mga alas 7 sa gabii sa Barangay Kamagayan.
Hinuon, si DepEd-Central Visayas Director Salustiano Jimenez, niingon nga ang mga estudyante sa night high school sa mga pampublikong institusyon nga mamauli human sa ilang klase sa alas 9 sa gabii dili angay dakpon panahon sa pagpatuman sa curfew basta makapakita sa ilang school IDs.
Dugang pa ni Jimenez nga ang mga pulong nga “night class” kinahanglang ibutang sa school ID aron dali mailhan.
Bisan og dili matino sa regional director ang eksaktong gidaghanon sa mga tinun-an sa night high school sa dakbayan sa Sugbo, gipasabot niya nga kasagaran kanila mga working student ug walay panahon sa pagtungha sa regular nga oras sa pagtungha.
Gimanduan usab ni Dalogdog ang iyang mga sakop nga hugtan ang police visibility sa publikong mga lugar karong holiday season, diin gilauman nga motaas ang insidente sa krimen.
