CEBU – Mokabat sa 400 ka mga tawo ang miduyog sa Suroy-Suroy Sugbo Southern Heritage Trail karong tuiga, nga nagsugod niadtong Biyernes, Nobyembre 18, 2022, sa lungsod sa Minglanilla duha ka tuig human kini gisuspenso tungod sa coronavirus disease (Covid-19) pandemic.
Matud pa ni Cebu Provincial Tourism Office (CPTO) head Marty Ybañez nga wala sila mabalaka sa gidaghanon sa mga tawo nga mosalmot sa tour, gumikan kay makatabang kini sa Probinsiya sa pagkab-ot sa tumong niini nga mapalambo pa ang mga tourist attraction sa Sugbo.
Dugang pa, nga mas taas ang ihap sa mga partisipante karong tuiga kon itandi sa Suroy-Suroy Sugbo niadtong 2019, diin 147 lang ang bisita.
Ang Suroy-Suroy Sugbo karong tuiga ipahigayon gikan sa Nobyembre 18 hangtod sa Nobyembre 20.
Kung diin nagtanyag og daghang travel packages, nga adunay presyo gikan sa P11,000 ngadto sa P16,000
Ang registration fee magdepende sa matang sa accommodation nga pilion sa mga bisita.
Kung diin ang mga partisipante mibisita sa pipila ka mga tourist attraction sama sa Anjo World theme park sa lungsod sa Minglanilla, museum sa Sibonga, ug Little Intramuros sa Argao.
Gipakita usab ang mga delicacy sa mga lungsod sa San Fernando, Dalaguete, Alcoy ug Boljoon.
