CEBU – Ubay-ubay nga mga kontrabando ang nasakmit gikan sa mga selda sa prisohan sa male dormitory sa Lapu-Lapu City Jail atol sa greyhound operation nga gipahigayon niadtong Biyernes sa buntag, Nob. 25, 2022.
Lakip niini ang mga lansang, cable wire, hand saw, improvised metal wire, nail cutter, guba nga salamin, busted lamp bulb, ug improvised wood working knife.
Ang tanang nakumpiska nga mga butang gi-dokumento ug gisaksihan sa mga opisyal sa barangay ug mga representante sa media ug kini gi-turnover ngadto sa Bureau of Jail Management and Penology (BJMP) alang sa tukmang disposisyon.
Kung diin ang operasyon gipangulohan ni Police Colonel Elmer Lim, hepe sa Lapu-Lapu City Police Office (LCPO), uban sa koordinasyon sa BJMP Lapu-Lapu City ug Philippine Drug Enforcement Agency sa Central Visayas (PDEA)-7.
Ang greyhound operation, nga usa ka surprise inspection sa mga jail cell, nagsugod alas 5:10 sa buntag taman sa alas 8:50 sa buntag.
Samtang ang mga piniriso gimanduan nga dili mogawas sa ilang mga selda sa prisohan ug magpundok sa ilang kaugalingon sa hawan sulod sa jail facility samtang gipahigayon ang inspeksyon sa mga selda sa prisohan.
Ang greyhound operation gihimo sa prisohan, nunot sa direktiba ni Brigadier General Roderick Augustus Alba, regional director sa Police Regional Office sa Central Visayas (PRO-7), ngadto sa tanang buhatan sa kapolisan aron mapadayon ang kampanya batok sa loose firearms ug uban pang law-ay nga elemento sa katilingban nga panalipdan ang kadalanan gikan sa mga kriminal, ilabi na karong holiday season.
