CEBU-Walay firecracker-related incident nga nahitabo sa dakbayan sa Sugbo niadtong bisperas sa Bag-ong Tuig.
Kini ang gipahibalo ni Police Colonel Ireneo Dalogdog, ang Director sa Cebu City Police Office (CCPO), nga kung diin P28,740 ang kantidad sa mga pabuto nga ilang nasakmit sa Barangay Inayawan ug Banawa area sa Barangay Guadalupe, dakbayan sa Sugbo niadtong Sabado sa hapon, Disyembre. 31.
Lakip sa nasakmit nga mga pabuto mao ang whistle bomb, kwitis, fountain, butterfly, Judas belt, ug uban pa.
Apan, wa masikop sa kapulisan ang giingong mga namaligya.
Sa kinatibuk-an, si Dalogdog niingon nga malinawon ang pagsugat sa Bag-ong Tuig sa dakbayan ug walay natala nga insidente sa indiscriminate firing.
Hinungdan nga nagkanayun ang opisyal nga epektibo ang ilang paningkamot batok sa pabuto ug nagpasalamat usab siya sa mga Sugbuanon nga nituman sa panawagan sa mga awtoridad nga likayan ang paggamit og pabuto sa pagsugat sa Bag-ong Tuig ug modangop na lang sa pipila ka alternatibo sama sa ‘torotot’.
Sa laing bahin, si Dalogdog niingon nga wala silay natala nga problema atol sa labing unang New Year Countdown sa SRP, ug kung diin aduna silay kinatibuk-ang 75 ka mga personahe ang gipakatap didto, nga giabagan sa 82 ka force multipliers.
Ang maong kalihukan gitambungan sa mga lokal nga opisyal sa dakbayan sa Sugbo lakip na si Mayor Michael Rama.
