Gikompirmar sa mga otoridad sa Police Regional Office 7 nga laing suspek sa pagpatay kang Negros Oriental Gobernador Roel Degamo, patay usab human makig-away sa hiniusang pwersa sa PNP Special Action Force ug mga kasundalohan.
Matud pa ni Police Lieutenant Colonel Gerard Ace Pelare, tigpamaba sa Special Investigation Task Group (SITG) wala pa masayran ang identity sa maong suspek.
Padayon pa ang hot pursuit operations batok sa ubang mga suspek.
Unang nasikop sa coordinated operation sa Bayawan City mao ang laing tulo ka mga suspek nga nipaubos sa custodial debriefing ug mihatag og importanteng impormasyon sa mga awtoridad.
Narekober usab sa mga otoridad ang pipila ka mga armas nga gigamit sa mga suspek sa pagpatay sa gobernador.
Lakip sa narekober ang upat ka assault rifles.
Samtang, ikaupat usab nga suspek ang nasikop sa mga otoridad kagahapong adlawa, Marso 5, sa Bayawan City.
Giila ang maong dinakpan nga si Osmundo Rivero, kanhi miyembro sa Philippine Army ug lumad nga taga Zamboanga City.
