PROVINCE OF CEBU-Gi-ablihan na pagbalik ang Mantalungon Livestock Market sa lungsod sa Barili subay sa paglibkas ni Cebu Provincial Governor Gwendolyn Garcia sa border control sa probinsiya batok sa African Swine Fever.
Apan mipahimangno si Barili Mayor Pablo John Garcia IV nga gikinahanglan adunay igong dokumento ang mga negosyante arun nga makabaligya pagbalik sa maong merkado.
Gilangkoban kini sa veterinary health certificate gikan sa municipal o provincial veterinary office.
Kahinumdoman nga gideklarar ni Governor Garcia ang paglibkas sa border control ug dili pagsunod sa color-coding scheme, human sa iyahang pakig-tigom sa tanang mga stakeholders, ingon man ang mga mayor sa One Cebu Island arun nga mag-usa sa mga polisiya nga ipatuman sa probinsiya sa pakigbatok sa ASF.
Mapasalamaton si Mayor John-John Garcia sa maong kalamboan ug sa ka-isog nga gipakita sa gobernadora diin dako ug tabang sa panginabuhi-an sa mga taga Barili ug Mantalongon ang pagpanumod ug baboy.
