CEBU CITY-Ipatuman sa Cebu City Police Office (CCPO) ang reshuffling sa mga station commander sa umaabot nga mga adlaw base sa resulta sa ilang performance evaluation.
Matod ni CCPO Chief Colonel Ireneo Dalogdog, bisan og epektibong lider ang 11 ka police station commanders, angayan silang organisahon pag-usab aron mas molambo ang ilang karera.
Sa miaging semana, si Brigadier General Anthony Aberin, pangulo sa Police Regional Office Central Visayas (PRO 7), nidayeg sa CCPO nga nakakuha sa labing taas nga performance rating sa 11 ka police stations niini.
Niangkon si Dalogdog nga ibalhin ang mga leader sa Parian Police Station 1 ug Waterfront Police Station 3.
Samtang si Major Henry Orbiso maoy modumala sa Parian police station, si Major Efren Diaz Jr. maoy mo assume sa Waterfront Police Station.
Gimanduan ni Dalogdog si Diaz nga magpakatap og mga personahe sa baywalk sa South Road Properties (SRP), nga sagad adtoan sa mga tawo panahon sa kagabhion.
Gitubag usab ni Dalogdog ang kamandoan ni Cebu City Mayor Michael Rama nga kinahanglang daling makaresponde ang kapolisan sa dakbayan sa alarma sa krimen sulod sa singko minutos.
Matod ni Dalogdog, aduna silay mga motorcycle-riding units nga gitahasan nga maoy unang moresponde kung mahitabo ang alarma sa pagpanulis sanglit makalusot sila sa trapiko.
