CEBU CITY-Nibarog nga lig-on sa ilang desisyon ang management sa Cebu South Bus Terminal (CSBT) nga naghatag og van for hires (v-hires) og 30-35 minutos lang nga mo-park sa sub-terminal, nga nahimutang sa luyo nga bahin sa CSBT.
Matud pa sa manager sa CSBT nga si Carmen Quijano, nga dili sila makasunod sa susamang mga regulasyon nga gigamit sa miaging transport hub sa Barangay Kamagayan, nga nagtugot sa mga v-hire nga makaparada nga walay pagdili sa oras ug makasakay sa mga pasahero.
Gipasabot ni Quijano nga gamay ra ang sub-terminal kon itandi sa Kamagayan hinungdan nga nagpahamtang og limitasyon sa oras aron mahatagan og kahigayonan ang ubang mga drayber nga makasakay og mga pasahero.
Matod niya nga 40 lang sa 200 ka v-hire units nga nagbiyahe sa habagatang mga rota ang mahimong ma-accommodate sa CSBT.
Ang matag van gihatagan lang ug 30-35 ka minuto sa paghulat sa mga pasahero, ug kinahanglan silang mobiya sa terminal pagkahuman sa gihatag nga oras, bisan kung ang 18-lingkoranan nga kapasidad napuno o wala.
