Gipahugtan na sa Cebu City Police Office (CCPO) ang ilang seguridad ug pagpangandam alang sa umaabot nga pagsaulog sa All Saints’ Day ug All Souls’ Day 2026.
Gibutang na sa CCPO ubos sa Full Alert Status ang tanang police units sugod kagahapon, Biyernes Oktubre 30 hangtod alas 12:01 sa kaadlawon sa Nobyembre 3, 2026.
Tumong niini nga masiguro ang kaandam sa kapulisan ug ang dali nga pagtubag sa bisan unsang insidente sa seguridad, ilabina kay gipaabot nga daghang mga tawo ang mobisita sa mga sam-ang.
Subay niini, gimandoan ang mga station ug unit commanders nga palig-onon ang checkpoint ug chokepoint operations, ug pahugtan ang border control.
Samtang, giawhag usab ni Cebu City Mayor Nestor Archival ang publiko nga makigtambayayong sa mga awtoridad aron masiguro ang malinawon ug hapsay nga pagsaulog sa Adlaw sa mga Santos ug Adlaw sa mga Minatay.
Gibutyag niini nga gidili ang pagdala ug mga hinagiban, armas, ilimnong maka hubog, ug mga sound system sa mga sam-ang.
Gipasaligan pud kapulisan nga ilang palig-onon ang seguridad aron makahandum ang mga pamilya sa Kalag-kalg ug makahinumdom sa ilang mga minahal nga namatay nga malinawon ug luwas.
Samtang, gisugdan usab ang personnel accounting pasado alas 8 sa buntag kagahapon, Oktubre 30, aron masiguro nga kompleto ug andam ang mga personnel sa tibuok panahon nga ipatuman ang Full Alert Status.
Ubos sa pagpangulo ni CCPO City Director Police Colonel Ricky Sumalde, gitutokan sa kapulisan ang pagpalig-on sa police visibility ug pagpugong sa mga kriminalidad aron masiguro ang kalinaw ug kahapsay atol sa Kalag-kalag.
Gihangyo usab sa CCPO ang publiko nga mosunod sa mga regulasyon sa mga sementeryo, ampingan ang mga personal nga gamit, likayan ang pagdala sa mga gidili nga butang ug dayong ipahibalo sa mga awtoridad ang bisan unsang kadudahang kalihokan o emerhensiya.
