LAPU-LAPU CITY, CEBU-Isip kabahin sa paningkamot sa kagamhanan sa Lapu-lapu sa paghawan sa ilang mga buhatan sa mga drug personality, ang Bureau of Fire Protection (BFP) sa dakbayan sa Lapu-Lapu mipaubos sa tanang 114 ka mga unipormadong opisyal ug personnel sa surprise drug test gahapon Hunyo 29 sa Gun-ob Central Fire Station.
Kini nga inisyatiba gilusad isip suporta sa Executive Order No. 35 ni Mayor Junard “Ahong” Chan, nga nagpasiugda sa usa ka trabahoan nga walay droga.
Ang nahisgutang testing gidumala sa City of Lapu-Lapu Office for Substance Abuse Prevention (CLOSAP) ug sa DOH-accredited B-Krus Drug Testing Center.
Kung diin, ang mga partisipante gilangkuban sa mga opisyal ug personnel gikan sa nagkadaiyang Lapu-Lapu City fire stations, sama sa Mactan Station, Poblacion, Babag, Marigondon, ug Central Station.
Samtang, ang Olango Island adunay kaugalingon nga iskedyul sa pagsulay, nga gilauman nga mahitabo sa sunod nga bulan.
Gipasabut ni Garry Lao, ang Executive Director sa CLOSAP, ang kahinungdanon sa pagsulay.
Gisuportahan usab kini sa District Fire Marshal Supt. Tito Purgatorio, isip usa ka paagi sa pag-ila sa mga indibidwal nga mahimong maimpluwensyahan sa mga droga ug makahimo og angay nga aksyon.
