LAPU-LAPU CITY, CEBU-Gipasakaan na og kasong Physical Injury o pagpamun-og sa Kapulisan sa Siyudad sa Lapulapu ang duha sa tulo ka mga minor edad nga giingong sakop sa gang nga nangulata sa laing minor de edad.
Ang Hepe sa Investigation and Detective Management Unit (IDMU) sa Lapulapu City Police Office, PLt. Col. Christian Torres mibutyag nga pulos tag 15 anyus ang duha nga gipasakaan og kaso samtang ang ikatulong suspek nga ilang na rescue nag-edad lang og 13-anyus nga wala na giapil sa kaso basi sa balaud alang sa minor de edad.
Matud ni Torres, naa-an lang biktima sa grupo sa gang sa mga minor de edad kay pareha kini’g pangalan sa ilang kontra.
Gihulagway hinuon ni Torres nga “isolated case” ang hitabo kay wala mitumaw sa laing lugar sa Lapulapu ang grupo sa gang sa mga batan-on ug dili sab membro sa gang ang biktima.
GIbutyag usab ni Torres nga mangilabot na usab ang DSWD sa hitabo sanglit naglambigit man kini og mga minor edad.
Nunut niini, gihangyo ni City Police Director, Coronel Elmer Lim ang mga ginikanan nga Bantayan ang ilang mga anak ilabi na mga tinun-an nga dili mag-apil-apil sa gang sa mga batan-on arun malikay sa krimen.
Hinuon, matud ni Col. Lim nga hugot nga gipatuman ang curfew ordinance sa Siyudad arun way mga minor de edad nga magsuroy-suroy sa halawom nga kagabhion.
