CEBU CITY-Mokabat sa P2.2 milyones nga emergency cash transfer (ECT) ang naapod-apod ngadto sa kapin 100 ka mga giila nga nasunogan sa tulo ka barangay sa dakbayan sa Sugbo niadtong Hulyo 13, 2023.
Nahitabo kini human nipadala og suwat si Cebu City South District Rep. Eduardo R. Rama, uban sa Cebu City Government, ngadto sa Department of Social Welfare and Development in Central Visayas (DSWD 7) nga naghangyo niini nga mohimo og assessment sa mga apektadong pamilya.
Nagkanayon ang Disaster Response Management Division sa DSWD nga 113 ka mga pamilya nga naapektuhan sa sunog gikan sa mga barangay sa Mambaling, Sapangdaku ug Guadalupe ang mga ECT recipients.
Kung kahinumduman, nga adunay mga barangay ang gipaubos sa state of calamity, tungod sa kadako ug epekto sa kadaot sa sunog sama sa Guadalupe niadtong Marso 7, nga nakaapekto sa 10 ka pamilya; Sapangdaku niadtong Marso 14, 48 ka pamilya; ug Mambaling niadtong Abril 19, 55 ka pamilya.
Gipahibalo nu DSWD 7 information officer Leah Quintana, nga ang Cebu City Government nihatag sa listahan sa mga apektadong pamilya.
Kung diin ang pag-apod-apod sa cash assistance ngadto sa mga biktima sa sunog gitino sa duha ka klasipikasyon: kadtong destroyed houses ug damaged houses.
Matod sa DSWD 7, ang mga pamilya kansang mga balay gideklarar nga destroyed nakadawat og 75 porsiyento sa regional wage rate (P326) sulod sa kinatibuk-ang 62 ka adlaw, samtang kadtong mga balay gideklarar nga damage makadawat sa samang kantidad sulod sa 31 ka adlaw lamang.
Sa pikas bahin, adunay gipang-apod-apod sa ECT, nga P1.9 milyones ang gihatag sa 95 ka pamilya kansang mga balay gideklarar nga naguba, samtang kapin sa P181,000 ang gihatag sa 18 ka pamilya nga mga balay gideklarar nga naguba.
Samtang ang DSWD 7 nihatag usab og kinatibuk-ang P2 milyones nga cash assistance pinaagi sa Assistance to Individuals in Crisis Situation program ug mihatag og pagkaon, ingon man non-food assistance nga nagkantidad og P881,000.
Nagtumong ang cash assistance sa pagdugang sa mga batakang panginahanglan sa mga apektadong pamilya, nga naglakip sa tambal, sinina, pagpaospital, transportasyon, suporta sa edukasyon ug pagkaon.
