MANDAUE CITY, CEBU-
Gibutyag sa usa ka opisyal sa kapolisan sa dakbayan sa Mandaue ngadto sa publiko nga likayan ang paglangoy kon mahubog ilabi na kon dili kaayo maayo ang panahon.
Matud pa ni Police Captain Waldo Batad, ang assistant station chief sa Opao Police Station sa Mandaue City Police Office (MCPO), niingon niini human napalgan ang usa ka patay nga tawo sa Ouano Wharf sa Barangay Looc, ning dakbayan, niadtong Martes sa hapon, Hulyo 25.
Giila ang biktima nga si Mario Garcia, 47 anyos ug residente sa Barangay Babag sa dakbayan sa Lapu-Lapu.
Base sa report sa Opao Police Station, sa pamahayag sa anak ni Garcia nga si Mary Ann Garcia, 26 anyos, nawala ang iyang papa o amahan sukad niadtong Domingo, Hulyo 23.
Ang iyang amahan uban sa iyang mga kabanay giingong miadto sa baybayon ug nag-inom mga alas 4 sa hapon. sa Sitio Turil, Barangay Canjulao sa dakbayan sa Lapu-Lapu.
Pasado alas 5:30 sa hapon, nakit-an si Garcia sa tunga sa dagat nga nagwarawara sa iyang kamot, ila dayon kining gisuwayan sa pagluwas apan lisod kaayo kini tungod sa kusog nga mga balod hinungdan nga mibalik sila sa baybayon.
Mibalik na usab sila sa dagat aron pagluwas kang Garcia pinaagi sa paggamit og upat ka mga sakayan, apan wala na kini igkita.
Napalgan ang lawas ni Garcia niadtong Martes sa hapon, Hulyo 25, sa Ouano Wharf sa Barangay Looc, dakbayan sa Mandaue.
Giadto dayon nila ang lugar diin nakit-an pa ang lawas nga naglutaw sa dagat.
Gihimo dayun ang usa ka retrieval operation sa coast guard ug nakuha ang lawas nga kompirmadong giila ni Mary Ann nga kini ang iyang amahan nga nawala.
