CEBU CITY-Nasikop ang usa ka gidudahan nga tigpayuhot og ilegal nga drogas sa gipahigayong buy-bust operation sa Philippine Drug Enforcement Agency (PDEA) 7 uban ang Philippine Navy’s Naval Forces Central (NAVFORCEN) ug Cebu City Police Office (CCPO) Station 10.
Nasakmit ang P850,000 nga balor sa gidudahang shabu atol sa operasyon sa Sitio Balagaon, Brgy. Labangon, Cebu City.
Nadakpan mao si Jerel James Torres, 29 anyos nga sa kasamtangang nagtrabaho isip usa ka marketing agent ug bag-ohay pa lang nalambigit sa pagpangyuhot og ilegal nga drogas.
Nasakmit sa maong suspek ang lima (5) ka pakete sa gituohang shabu nga adunay gibug-aton nga 125 gramos apil na ang buy-bust money, usa (1) ka mobile phone, ug lain pang mga ebidensiya.
Kasong kalapasan sa Section 5 ug Section 11 Article II sa RA 9165 ang gikatakdang ipasaka batok sa suspek.
