CENTRAL VISAYAS-Pormal na nga giduso sa usa ka progresibong labor group ngadto sa Regional Tripartite Wages and Productivity Board (RTWPB)-7 ang P100 nga daily wage hike sa Central Visayas, nunot sa pagpahigayon og protesta sa regional nga buhatan sa Department of Labor and Employment.
Nakatigom ang mga sakop sa Alyansa sa mga Mamumuo sa Sugbo-Kilusang Mayo Uno o AMA Sugbo-KMU og kapin sa 600 ka mga pirma gikan sa mga trabahante ug ilang mga pamilya nga gikan sa mga dakbayan sa Sugbo, Mandaue, ug Lapu-Lapu, ug pipila ka mga dapit gikan sa ikatulong distrito sa Probinsiya sa Sugbo isip pagsuporta sa naasoy nga wage increase sa minimum wage, basi sa gibutyag sa pango sa AMA Sugbo KMU nga si Jaime Paglinawan.
Dugang pa niini nga dako ang kapasidad sa mga negosyante dinhi sa Central Visayas sa paghatag sa umento sa suhulan basi sa 2020-2022 Gross Regional Domestic Product (GRDP) sa Central Visayas nga gipagawas sa Philippines Statistics Authority (PSA) nga nagtaho sa mga produkto ug ginansya nga nahimo sa mga mamumuo.
Sa laing bahin, ni-file pud og petition ang labor group nga Alyansa sa Mamumuong Kontraktwal sa Sugbo (ALSA Kontraktwal Cebu) para sa susamang wage increase kung diin gihimong rason ang krisis sa ekonomiya isip valid justification para sa giduso nga pagtaas sa sweldo sa mga mamumuo.
Kahinumduman nga gi-aprobahan sa RTWPB-7 ang P31 nga umento sa sweldo kada adlaw sa tanang mamumuo sa pribadong sektor ug P500 matag buwan nga usbaw sa mga domestic worker sa Central Visayas sa nilabay nga Hunyo 14, 2022.
