Andam ang Office of the Solicitor General (OSG) nga modepensa sa korte sa wage order nga nagtakda og usbaw sa sweldo sa mga trabahante sa National Capital Region (NCR).
Sumala ni Palace Press Officer USec. Claire Castro, ang hustong solusyon alang sa mga supak sa wage order mao ang pagpasaka og apela sa Regional Tripartite Wages and Productivity Board, ug dili dayon pag-adto sa korte.
Wala mohatag og pasalig si Castro kung ipatuman ba ang P85 nga usbaw sa sweldo human sa 20 ka adlaw nga balido sa temporary restraining order (TRO), apan iyang giinsistir nga ang gobyerno magpadayon sa pakigbisog alang sa wage order alang sa kaayohan sa mga trabahante.
Subay niini, mopasaka si Sen. Raffy Tulfo og balaodnon aron usbon ang Article 126 sa Labor Code aron malikayan ang kalibog sa pagpatuman sa pagtaas sa sweldo.
Gipasiugda sa Senador nga ang pagpanghilabot sa bisan unsang korte dili madawat tungod kay ang balaod klaro nga nagdili kanila sa pag-isyu og TRO o injunction batok sa proseso sa Regional Wage Boards.
