Gitugyan sa Malacañang ngadto sa Senado ang desisyon kung mag-isyu ba og subpoena batok kang Bise Presidente Sara Duterte aron pugson siya sa paghatag og testimonya sa iyang kaugalingong impeachment trial.
Matod ni Palace Press Officer Undersecretary Claire Castro, anaa na sa Senado ang pagdesisyon kung mohangyo ang house prosecution panel nga motindog sa witness stand ang Bise Presidente aron pamatud-an ang iyang pagka-inosente kalabot sa mga pasangil batok kaniya.
Namatikdan usab ni Castro nga posible nga nagtinguha ang prosecution nga patambungon si Duterte tungod kay mipadayag na siya kaniadto sa iyang kaandam nga atubangon ug klarohon ang mga pasangil batok kaniya.
Samtang, ang tigpamaba sa impeachment court nga si Regie Tongol nagpahayag nga posible nga ipahigayon ang oral arguments kung pormal nga mohangyo ang prosecution og subpoena aron pugson ang Bise Presidente nga motambong ug mohatag og testimonya sa pagdungog.
