MANDAUE CITY, CEBU-Gipatawag ni Mandaue City Mayor Jonas Cortes ang drainage committee system ug flood committee, subay sa halapad nga pagbaha sa dakbayan human sa sunod-sunod nga adlaw nga mibunok ang uwan.
Gitahasan sila sa mayor sa paghimo og pakisusi sa estado sa mga proyekto sa drainage sa Mandaue.
Katuyoan sa mayor nga masusi ang kongkreto nga hinungdan sa padayon nga problema sa pagbaha panahon nga mokusog ang uwan.
Gipasubay ni Mayor Cortes ang mapa sa master plan sa dakbayan arun nga masuta kung asa nang mga dapita diin nahuman ang mga proyekto sa drainage.
Sa dali nga panahon, gusto sa mayor nga mahatagan og solusyon ang mga problema sa pagbaha, ingon man ang pagsulbad sa problema sa mga drainage nga barado na sa mga basura.
Samtang, gipahigayon usab ang panagtigom sa City Disaster Risk Reduction and Management Council, diin gihisgotan ang mga sistema ug mga pamaagi sa pagtubag ug pag-responde sa mga mahitabong emerhensiya.
Kauban usab sa maong panagtigom si Mayor Cortes, ingon man ang mga department heads sa dakbayan.
