CEBU PROVINCE-Patay ang usa ka 16-anyos nga batang lalaki dihang natumbahan sa punoan sa lubi mga alas 9 sa buntag Huwebes, Septiyembre 21, sa Sitio Tagaytay sa bukirang barangay sa Ampongol sa lungsod sa Sogod, amihanang Sugbo.
Giila ang biktima nga si James Marvie Brigoli Apor, 16, residente sa nahisgutang lugar.
Matod ni Patrolman Panfilo Escoton Jr. sa Sogod Municipal Police Station nga naglakaw ang biktima paingon sa iyang panimalay atol sa kusog nga ulan dihang natumba ang usa sa mga punoan sa lubi ug natumba.
Matod ni Escoton nga nihuyang ang punoan sa lubi human gikaon sa mga ulod sa kakaw ang bahin niini, ug sa dihang mihapak ang kusog nga hangin, natumba kini.
Ang lalaki gideklarar nga dead on the scene sa mirespondeng mga personahe sa Sogod Police Station ug Sogod Rural Health Unit nga gipangulohan ni Dr. Yaphete John Cabalo.
