CEBU CITY-Gipusil-patay ang usa ka 24-anyos nga babaye sa Sitio Alumnus Asophuwa, Barangay Basak San Nicolas, Dakbayan sa Sugbo gahapon Martes, Oktubre 10, 2023.
Giila ni Patrolman Felmar Gomez, investigator sa Mambaling Police Station ang biktima mao si Jan Niña delos Santos Lacumba, residente sa nahisgutang lugar.
Dugang pa, nga matud sa pipila ka mga saksi, naglingkod ang biktima sa usa ka bangko gawas sa ilang balay dihang niabot ang gunman ug gipusil kini sa ulo.
Daling misibat ang mamumuno paingon sa wala matinong direksyon.
Gisusi pa sa kapolisan ang tinuod nga motibo sa maong insidente.
Sa pikas bahin, matod ni Police Major Jonathan Taneo, ang hepe sa Mambaling Police Station, nga usa sa mga sad-an ang gikatahong nag-obserbar sa lugar sa wala pa ang insidente.
Taud-taud, niabot ang namusil ug gipusil ang ulo sa biktima nga walay bisan unsang paghagit.
Sumala pa ni Taneo nga posibleng nasaypan nga police asset ang biktima.
Kini gumikan kay gipasakaan siya og kaso sa paghimo og police report niadtong Lunes, nga misangpot sa pagkasikop sa usa ka drug dealer sa naasoy nga dapit, apan sa among pagtuki, walay police operation.
