CEBU CITY- Gabuy-od nang naabtan sa mga nirespondeng sakop sa Inayawan Police Station ang usa ka 32-anyos nga lalaki human kini gipusil-patay sa wala pa mailhing mamumuno, didto sa Sitio Kauswagan, Brgy. Basak Pardo, Dakbayan sa Sugbo,pasado alas 3:00 sa hapon Sabado, Hunyo 20, 2026.
Nailhan ang biktima nga si Reggie Apostol, 32-anyos, walay trabaho, ug residente sa Sitio Soran, Brgy. Kinasang-an Pardo sa maong dakbayan.
Nakahiagom si Apostol og samad-pinusilan sa iyang ulo gikan sa wala pa matino nga kalibre sa armas.
Subay sa inisyal nga imbestigasyon, gikatahong misuroy lang ang biktima sa Sitio Kauswagan aron bisitahon ang iyang mga kaila. Apan sa iyang pag-agi sa usa ka hagip-ot nga dalan, kalit lang kini nga gipusil sa makaduhang higayon sa wala pa mailhi nga suspetsado.
Anggulo sa ilegal nga drugas ang usa sa mga labing gitan-aw nga motibo sa kapulisan sa maong krimen, sanglit nakuha sa inisyal nga impormasyon nga tiggamitan og ginadiling drugas ang biktima.
Nasayran usab nga nadakpan na kaniadto si Apostol tungod sa ilegal nga pagpusta og swertres.
Sa pagkakaron, padayon ang imbestigasyon sa kapulisan sa Inayawan Police Station sa maong insidente lakip na ang pag-ila ug paggukod sa wala pa mailhi nga mamumuno.
