CEBU CITY-Pasakaan og kasong Frustrated Murder ang usa ka 23-anyos nga babayi kinsa namusil sa higala sa iyahang uyab nga gikabutyag nga kusog mupanalipod sa mga sayup nga mga binuhatan niini, lakip na ang pambabayi.
Mao kini ang gibutyag ni Police Staff Sergeant Jaymos Tordios, ang general investigator sa Inayawan Police Station.
Giila ang suspek nga si Geraldyn Sanchez, 23-anyos, nga lumlupyo sa Sitio Lower Sto. Niño, Brgy.Inayawan ning Dakbayan sa Sugbo.
Samtang, ang biktima giila nga si Johnny Veloso, 31-anyos, minyo, nga usa usab ka residente sa naasoy nga lugar.
Sa pasiunang imbestigasyon sa Inayawan Police Station, nasayran nga ang biktima mao ang sagad nga magtabon-tabon sa uyab sa suspetsado ug gani maoy nahimong rason sa kanunay nga pambabayi niini.
Nasayran usab nga nakaangkon og samad pinusilan ang biktima sa tuong braso ug wala nga paa.
Gidalikyat kini ngadto sa tambalanan diin nag padayon pa kini sa pagpa-alim sa samad nga nahi-aguman niini.
Gibutyag usab niini nga stable na sa kasamtangan ang biktima ug aduna kini plano nga pasakaan ug kasong Frustrated Murder ang maong suspetsado.
Dugang pa, kasamtangan nga gihikay ang kasong violation sa RA 1059 1 o ang illegal possession of firearms (Comprehensive Firearms and Ammunition Regulation Act) gumikan kay ang armas sa suspek nakumpiska atol sa iyang pagkasikop atol sa hot pursuit operation.
Atubangon usab ni Sanchez ang posibleng kaso nga COMELEC gun ban, hinungdan nga mahimo siya nga mag-atubang og 3 ka kaso.
