Patay ang usa ka amahan ug anak, samtang angol ang inahan human gidunggab sa Purok Eskwelahan, Barangay Inayagan, dakbayan sa Naga pasado alas 2:00 sa kaadlawon niadtong Domingo, Mayo 10, 2026.
Giila ang mga biktima nga sila si Conrado Tapdasan, 59, ug anak niini nga si Dominic Tapdasan, 21. Samtang, ang naangol nga inahan mao si Edna Tapdasan, 49. parehas nga residente sa susamang dapit.
Nailhan usab ang suspitsado nga si Albert Sedeño, 28, taga Purok Tower, Barangay Inayagan, dakbayan sa Naga.
Base sa inisyal nga imbestigasyon nasayran nga nag-inom ang suspek atol sa fiesta sa Bayong, Barangay Inayagan, uban sa laing anak sa mga biktima nga si John Carlo Tapdasan.
Matod sa mga otoridad nga gusto sa suspek nga mosayaw si John Carlo, apan sa dihang mibalibad kini, nisamot ang panaglalis nga misangpot sa panagsinumbagay, nga maoy mitapos sa disco.
Tungod niini ang suspek misulong sa pinuy-anan ni John Carlo, apan wala kini sa panimalay Inay iyang nasugatan ang mga ginikanan ug igsoon ni John Carlo.
Tungod sa kasuko, giatake sa suspek ang pamilya, nga miresulta sa kamatayon sa amahan ug usa ka anak nga lalaki, samtang ang inahan naluwas nga adunay mga samad.
Miikyas ang suspek human sa insidente apan dali kining nasikop sa mga sakop kapolisan sa Naga City Police Station, sa Barangay Linao, Dakbayan sa Talisay, diin siya midangop.
Nakuha sa mga awtoridad ang kutsilyo nga gituohang gigamit sa pag-atake.
Kasamtangan karon nga nag-atubang og 2 ka ihap sa kasong murder ug frustrated murder.
