CEBU CITY-Nasakpan ang usa sa duha ka mga establisemento nga nakahimo og dakong kalapasan sa ordinance No.1413 nga nailhan nga mao ang ‘Liquor Licensing Ordinance,” dinhi sa syudad sa Sugbo.
Gidid-an niining maong ordinansa ang tanang mga bars, beer houses, og karaoke lounges nga may gilay-on lang nga 100 meters gikan sa mga eskwelahan og mga simbahan sa pagpamaligya og mga ilimnong makahubog ilabi na gyud ngadto sa mga menor de edad.
Kini ang gipahibawo sa pangulo sa CAIB Dr. Lucelle Mercado atol sa usa ka joint operation sa City Anti Indecency Board (CAIB) ug Liquor Licensing Division ug sa Kapulisan sa Syudad human 43 ka mga menor de edad ang nasakpan nga nag-inom.
Napanglantawan nga ang tag-iya ning maong establisemento makamulta og P215,000 nga bugti sa P5,000 matag menor de edad nga ilang gidalitan og ilimnong makahubog.
Samtang ang establisemento sa may Osmena Blvd nasakpan nga expired na ang mga regulatory permits sama sa liquor, sanitary, og fire.
Ang joint team ni Dr Mercado nga nipahigayun sa kinalit nga pag-inspection gilangkoban sa CCPO , BPLO, og sa Liquor Licensing Division sa Cebu City Government.
Dugang niini, na-obserbahan ni Dr Mercado nga kasagaran sa mga batan-on dinhi sa syudad sa Sugbo adunay sayop nga pagtuo nga makahimo na sila sa pag-inom og ilimnong makahubog tungod lang kay niabot na sila sa pangidaron nga 18.
