CEBU CITY-Nag-atubang sa kasong kalapasan sa Section 5 ug Section 11 subay sa Article 2 RA 9165 o Comprehensive Dangerous Drugs Act of 2002, ang nasikop nga High Value Individual drug personality ug usa ka ‘gituohang downline’ human sa buy-bust operation nga gipahigayon sa Stations Drug Enforcement Unit sa Mambaling Police Station.
Giila ang mga suspetsado nga sina Judith Berdisola Dignos, 43 -anyos, taga Brgy. Calamba, Cebu City ug si Victoria Elpalmado Aida, 50-anyos, taga Brgy. Tisa, dakbayan sa Sugbo.
Nasayran nga mokabat sa 1,017 grams o mobalor sa P6,936,000 nga gituohang shabu ang nakuha gikan sa mga dinakpan.
Gawas niini, nakuhaan usab og ebidensya gikan kang Judith Dignos ang 2 ka medium size, 10 ka large pack sa gituohang shabu ug si Victoria Aida diin nasakmitan og 2 ka medium size sa gituohang ilegal nga drugas.
Sa imbistigasyon sa kapulisan diin si Dignos maka-dispose og dili mo-ubos sa 500 grams sa gidili nga drogas matag semana ngadto sa naasoy nga barangay ug sa mga kasikbit niining dapit.
Sa pikas bahin, gipahugtan usab ang security measures sa area of responsibility sa mambaling police station ang ilang ‘police visibility’ hilabi na sa mga ‘areas of converge’, ingon man nga nagpadayon ang kapulisan sa ‘pag-enforce’ sa mga balaod sa pagmintinar sa ‘peace and order’ sa maong lugar.
