CENTRAL VISAYAS-Gisiguro sa Bureau of Fisheries and Aquatic Resources (BFAR) nga nagpadayon ang ilahang regular rotational deployment sa West Philippine Sea.
Sa eksklusibo nga pakighinabi sa Bombo Radyo Cebu ni Nazario Briguera, ang Chief Information Officer sa BFAR, gipasabot niini nga nag-unang katuyoan sa maong deployment kay ang paghatag og suporta sa mga mananagat nga anaa sa West Philippine Sea, ubos sa proyekto nga LAYAG o Livelihood Activities to Enhance Fisheries Yield and Economic Gains, kung diin mitagana og pondo ang BFAR arun nga hatagan og pagtagad ang mga mananagat gikan sa mga lugar nga nag-atubang sa West Philippine Sea.
Matud pa, bisan pa man sa mga tensyon nga nahitabo sa naasoy nga kadagatan, nagpadayon ang ilahang mandato sa pagprotihir ug paghatag og tabang sa mga mananagat, kinsang giila usab nga mga bag-ong bayani sa Pilipinas.
Ang maong pamahayag sa BFAR kay subay sa report nga adunay mga langyaw nga mananagat nga nagbutang og cyanide sa Bajo de Masinloc, niadtong Pebrero 15, 2024.
Sigon ni Briguera nga ang maong report kay hilabihan nga naka-alarma kanila sa BFAR, hinungdan nga dali sila nga nagpahigayon og imbestigasyon sa maong insidente ug nagtigom og igong mga ebidensya arun sa pagpamatuod niini.
Gipasabot niini nga ang cyanide kay usa ka matang sa ‘destructive fishing’ diin usa kini ka powder nga ibutang sa tubig ug ibuga ngadto sa mga coral reefs arun nga mangamatay ang mga isda ug dali na kini nila nga makuha.
Gitino usab ni Briguera nga dili lang ang mga isda ang mangamatay niini, inay mismo usab ang mga coral reefs nga hilabihan ka importanti alang sa mga isda.
