LILOAN, CEBU-Wala na nakaikyas ang usa ka kawatan human kini nasigpatan sa mga aktibong mga Tanod sa Barangay Poblacion, Liloan, Cebu sa iyang nahimutangan niadtong miaging adlaw.
Giila ang suspek nga si Jorge, 31-anyos ug lumad nga taga Zamboanga del Sur, usa ka Jeepney Dispatcher ug residente sa Panagdait, Barangay Kasambagan ning dakbayan sa Sugbo.
Matud pa nga ang akusado adunay pending nga Warrant of Arrest sa kasong Robbery nga giluwat ni Hon. Ameli Amor Rabor Estrada, Presiding Judge sa MCTC Liloan-Compostela, Cebu niadtong Enero 12 ning tuiga ug adunay pyansa nga gitanyag alang sa iyang temporaryong kagawasan niini nga nagkantidad og P18,000.
Subay niini, mipasalig ang mga kapulisan sa Liloan nga padayon ug dili sila mohunong sa pakigbatok sa mga kriminalidad sa ilang lungsod hilabi na sa matang sa iligal nga drogas.
Gani, dako ang pasalamat sa mga sakop sa kapulisan sa naasoy nga lungsod ngadto sa mga Barangay tanod ug uban pa nga nakigtambabayong sa pagtuldok sa krimen ug pagpatuman sa kalinaw ug kahapsay sa ilang dapit.
