CEBU CITY-Gipasabot ni Cebu City Councilor Philip Zafra kung nganong wala gi-aprobahan ang ordinansahon nga giduso ni Cebu City Councilor Nestor Archival.
Matud pa, nakasabot ang konseho nga maayo ang katuyoan ni Archival alang sa kaayohan sa kinaiyahan, apan giingong dili man angayan nga bangga-on ang usa ka national law sa usa lamang ka ordinansahon.
Gi-asoy ni Zafra nga adunay usa ka national law nga naglangkob sa kaminyuon ug aduna kini mga basic requirements nga mao ang sundon.
Kung ugaling ilakip sa requirements ang ordinansahon ni Konsehal Archival nga mag-tree planting ang buot mag-minyo, giingong gikinahanglan pa nga adunay pag-usab niini sa national law arun nga malakip ang buot nga ipatuman sa naasoy nga konsehal.
Sugyot na lang ni Councilor Zafra nga inay ang mga mag-minyo ang patamnon, mamahimong ang mga tawo na lang nga nagdawatan og benepisyo sa syudad, sama na lang sa liboan ka mga Cebu City scholars, mga government ug health employees nga nagdawatan og subsidiya, mga naka-benepisyo sa CHAMP, ingon man ang mga seniors ug PWDs.
Sigon sa konsehal nga mahimong sugdan ang pagtanom sa mga public school ug sa mga yuta nga gipanag-iya sa syudad sa Sugbo.
